Information is intelligence
HomePoliticsबामदेवले धोका दिए: प्रचण्ड

बामदेवले धोका दिए: प्रचण्ड

- Advertisement -spot_img

काठमाडौं, २१ साउन । बालुवाटारमा प्रधानमन्त्री केपी शर्मा ओलीले बोलाएपछि भेट्न जान लाग्दा भैंसेपार्टीस्थित निवासबाट निस्किएका बामदेव गौतम मंगलबार रोक्किए । उनी फर्किए । नेकपा अध्यक्ष पुष्पकमल दाहाल प्रचण्ड भेट्न आइरहेको खबर पाउनेवित्तिकै उनी फर्किएका थिए ।

विहान ११ बजे बामदेव निवासमा पसेका प्रचण्डले पौने घन्टाजति कुराकानी गरे । उनले बामदेवको धारणा बुझे । गौतमले आफूले प्रस्तुत गरेको छ बुँदामै सहमति निकालौं भने । प्रचण्डले बुँदामा केही परिमार्जनमा जोड दिए । स्रोतका अनुसार प्रचण्डले ओलीले एउटा पद छाड्नैपर्ने अडान राखे । गौतमले पनि अर्ली महाधिवेशनमा जाऔं, पार्टीलाई फुट्न नदिऔं भने ।

प्रचण्डले गौतमको धारणा बुझे । उनले ओलीसँग सम्झौता गरिसकेको चर्चा चलिरहेको थियो । प्रचण्डले पक्ष विपक्षको विषय उठाए । बामदेवले आफू कुनै निश्चित नेता वा विचार समूहको पक्षमा नभई पार्टी एकताप्रति दृढ रहेको स्पष्ट पारेको सहयोगी विश्वमणि सुवेदीले जनाएका छन् । त्यसपछि प्रचण्डले सोधे, अब तपाईं के गर्नुहुन्छ ? बामदेवले कुनै गुटमा नलाग्ने जवाफ दिए । त्यसपछि प्रचण्ड फर्किएका थिए ।

बामदेवको कुरा बुझेपछि प्रचण्डले यसबारे वरिष्ठ नेताद्वय माधवकुमार नेपाल र झलनाथ खनाललाई जानकारी गराएका थिए । प्रचण्ड, माधव र झलनाथको समुहमा छलफल हुँदा बामदेवले धोका दिए भन्ने सम्मको विषय आएको छ । विश्वस्त स्रोतका अनुसार बामदेवले धोका दिएको विषय प्रचण्डले नै निकटस्थहरुसँग राखेका छन् । शुरुमा भैंसेपाटीमा बसेर ओलीलाई सरकार र पार्टीबाट हटाउने समुह तयार गर्न बामदेव नै सक्रिय भएका थिए । तर, अहिले उनी नै कुनै गुटमा छैन भन्न थालेपछि प्रचण्ड र माधव नेपाल नयाँ रणनीतिबारे छलफलमा केन्द्रित भएका छन् ।

माधव नेपालले शुरुमै बामदेवबाट विश्वास गर्न नसकिने धारणा राखेका थिए । यसअघि पनि बामदेवले ओलीबाट प्रधानमन्त्रीको प्रस्ताव आएपछि अडान छाडेको उल्लेख गर्दै नेपालले यस्तो धोकालाई आश्चर्य मान्नुनपर्ने बुझिएको छ । नेपालले अब ओलीसँग डटेर सामना गर्ने तर पछाडि नहट्ने भन्दै निकटस्थलाई तयार रहन भनेका छन् । यसबारे प्रचण्डसँग पनि छलफल बढाएपनि उनी संयमित भनेर बढ्न चाहन्छन् ।

यता प्रचण्ड आफ्नो समुहका नेताहरु ओलीतिर जाने हुन् कि भनेर शतर्क भएका छन् । लेखराज भट्टले गुट छाडिसकेका छन् । रामबहादुर थापा बादल पनि ओलीसँग नजिक भएका छन् । पछिल्लो समय पार्टी एकताको पक्ष भन्दै पूर्व माओवादीको टोपबहादुर रायमाझी, चक्रपाणि खनाल, मणि थापालगायतको समुह सक्रिय भएको छ । ओलीलाई यसपटक डगमगाउन नसके भविष्यमा आफूहरुमाथि झ्न खतरा आउनसक्ने भन्दै माधव पक्ष सतर्क भएको छ । उक्त पक्षमा केही नेताहरुले ओलीलाई गोमन साँपको संज्ञा दिदै चलाएर छाडेमा गम्भीर परिणाम भोग्नुपर्ने सम्म भनेका छन् । नेतृ रामकुमारी झाँक्रीले फेसबुकमा सोही आशयको धारणा लेखिसकेकी छिन् ।

ओली अडानबाट टसमस नहुने र प्रचण्ड, माधव र झलनाथ पनि राजीनामाको अडानबाट पछि नहट्ने अवस्थाले टकरावलाई कम गर्न भन्दा झन् जटिलता थप्ने देखिदै गएको छ । बरु दुवै पक्ष एक अर्काका निकटस्थहरुलाई आफूतर्फ तान्न सक्रिय भएका छन् । ओलीले यसमा राम्रो सफलता हासिल गरेका छन् । उनले कतिपयलाई आगामी मन्त्रिमण्डल पुर्नगठनमा राख्ने सम्मको आश्वासन दिएपछि प्रचण्ड र माधव नेपाल समस्यामा परेका छन् ।

दरबार टाइम्समा प्रकाशित सामग्रीबारे कुनै गुनासो, सूचना तथा सुझाव भए हामीलाई durbartimes@gmail.com मा पठाउनु होला।

- Advertisement -spot_img

LEAVE A REPLY

Please enter your comment!
Please enter your name here

सम्बन्धित खवर

- Advertisement-spot_img

ट्रेन्डिङ

सिफारिस

धेरै कमेन्ट गरिएका

साताका समाचारहरु