Information is intelligence
HomeNewsविराटनगरका अस्पतालले उपचार नगर्दा गर्भवतीको मृत्यु

विराटनगरका अस्पतालले उपचार नगर्दा गर्भवतीको मृत्यु

- Advertisement -spot_img

मंगलबार राति शौचालयमा लडेकी ७ महिनाकी गर्भवती कानेपोखरी गाउँपालिका की २३ वर्षीया सविना थापा (दर्जी)को विराटनगरका ७ वटा अस्पताल घुमाउँदा पनि अस्पतालले भर्ना नगरेपछि उपचार नपाएको कारण बिहीबार बिहान मृत्यु भएको छ ।

शौचालयमा लडेकी उनको बाहिर चोटपटक नदेखिएपनि स्वास्थ्य अवस्था बिग्रदै गएपछि बुधबार राति सविनालाई उपचारका लागि विराटनगर ल्याइएको थियो । तर, आफन्तले विराटनगरका सबै साना ठूला अस्पताल चाहारे पनि भर्ना पाएनन् ।

नोबेल मेडिकल कलेज, विराट मेडिकल कलेज, विराट नर्सिङ होम एवं विराटनगर, ग्रीनक्रस, सुरक्षा र कोशी अस्पतालले पनि उपचार गर्न नमानेपछि उनको अवस्था थप बिग्रिएको र बिहीबार बिहान सविनालाई धरानस्थित बीपी कोइराला स्वास्थ्य विज्ञान प्रतिष्ठान लगिएको थियो ।

प्रतिष्ठानमा उपचार सुरु गरेको केहि समयमै सविनाको मृत्यु भयो । समयमा अस्पताल नल्याएकोले मृत्यु भएको प्रतिष्ठानले जानकारी दिएको सविनाका श्रीमान भरत दर्जीको भनाइ छ ।

विराटनगरका अस्पतालले भर्ना लिन नमानेकै कारण ७ महिनाकी गर्भवती श्रीमतीको मृत्यु भएको भन्दै उनका श्रीमानले दोषीलाई कार्वाहीको माग गरेका छन् । लडेर घाइते भएकी श्रीमतीलाई कोरोनाको बहानामा उपचार गर्न नमान्नु ज्यादती र चरम लापर्वाही भएको उनको गुनासो छ ।

एम्बुलेन्समा राखेर रातभर विभिन्न अस्पताल घुमाएपनि कसैले उपचार गर्न नमानेको बरु उल्टै अस्पतालले हप्कीदप्की गरेको परिवारको भनाइ छ । अस्पतालहरुले आईसीयू र भेन्टिलेटर नभएको तथा कोरोना परीक्षण नगरेको भन्दै भर्ना गर्न नमानेको मृतकका श्रीमानले बताएका छन् । श्रीमतीको उपचार गर्न आग्रह गर्दै धेरै डाक्टरको खुट्टा समाएर हारगुहार गर्दा पनि कसैले पनि वास्ता नगरेको उनको गुनासो छ ।

प्रहरीका अनुसार उपचार नपाएर मृत्यु भएकी सविनाको शरीरमा बाहिरी चोटपटक नभएपनि गर्भमा समस्या परेका कारण मृत्यु भएको हुनसक्ने प्रहरीको आशंका छ। उनको मृत्युको कारण पोष्टमार्टमपछि खुल्ने प्रहरीले जनाएको छ । पाँच वर्षअघि अन्तरजातीय प्रेम विवाह गरेका सविना र भरतको पहिलो सन्तान ४ वर्षकी छोरी छन्।

यसअघि गत भदौ १४ गते विराटनगरका निजी अस्पतालले उदयपुरको चौदण्डीगढी-६ की डम्बरकुमारी बस्नेतको भात सर्किएर बेहोस भएपछि उपचारका लागि आउदा भर्ना गर्न नमानेर मृत्यु भएको थियो ।

यस्तै भदौ ११ गते मोरङको पथरीशनिश्चरे नगरपालिका– २ की ६२ वर्षीय सानकुमारी राईको पनि अस्पतालले भर्न नलिँदा उपचार नपाएर मृत्यु भएको थियो । एक्कासी पिसाब बन्द भएपछि झापाको बिएण्डसी अस्पताल बिर्तामोड हुँदै विराटनगरका सबै अस्पताल रातभर घुमाउँदा पनि भर्ना नपाएकी उनको कोशी अस्पतालमा भर्ना गरिएको केही समयमै मृत्यु भएको थियो ।

विरानगरका अस्पतालले उपचार गर्न नमानेको कारण भदौ महिनामा मात्र ४ जना विरामीको मृत्यु भइसकेको छ । यो अवस्था अन्त्य गर्न मोरङका प्रमुख जिल्ला अधिकारी कोषहरि निरौलाले मंगलबार सबै अस्पतालका सञ्चालक र चिकित्सकलाई बोलाएर उपचार नपाएर बिरामीको मृत्यु भएमा कारबाही अघि बढाउने चेतावनी दिएका थिए ।

प्रदेश सरकारले  बिरामीको उपचार नगर्ने अस्पताललाई कारबाहि गर्ने चेतावनी दिए पनि उस्तै घटना दोहोरिएका छन् । कोरोनाले भन्दा पनि उपचार नपाएर अन्य विरामीले अकालमै ज्यान गुमाउनुपर्ने घटनाहरु बढिरहेका छन् ।

दरबार टाइम्समा प्रकाशित सामग्रीबारे कुनै गुनासो, सूचना तथा सुझाव भए हामीलाई durbartimes@gmail.com मा पठाउनु होला।

- Advertisement -spot_img
- Advertisement-spot_img

LEAVE A REPLY

Please enter your comment!
Please enter your name here

सम्बन्धित खवर

ट्रेन्डिङ

सिफारिस

धेरै कमेन्ट गरिएका

साताका समाचारहरु