Information is intelligence
HomePoliticsक्रियाशील सदस्यता नवीकरण गर्न एक साता म्याद थप

क्रियाशील सदस्यता नवीकरण गर्न एक साता म्याद थप

- Advertisement -spot_img

१४औँ महाधिवेशनको तयारीमा रहेको कांग्रेसले नवीकरण गर्न छुट भएका क्रियाशील सदस्यहरुलाई पुनः नवीकरण गर्ने मौका दिएको छ । केन्द्रीय क्रियाशील सदस्यता छानविन समितिले ७७ वटै जिल्लालाई परिपत्र गर्दै असार ९ गतेभित्र छुट भएका क्रियाशील सदस्यता नवीकरण गरी त्यसको विवरण पठाउन निर्देशन दिएको हो ।

धेरै सदस्यहरुको नवीकरण छुट भएको र त्यससम्बन्धी गुनासो समेत आएकाले नवीकरण गर्ने मौका दिइएको छानविन समितिका सदस्यसमेत रहेका नेता जीवन परियारले जानकारी दिए ।

‘सामान्यत: विधानले पार्टीको आधिकारिक उम्मेदवार विरुद्ध विद्रोही उम्मेदवार बनेको वा त्यस्तो विद्रोही उम्मेदवारको प्रस्तावक समर्थन बनेको, पार्टी अनुशासनको कारवाहीमा परेको, पार्टी परित्याग गरेको र निधन भएको अवस्था मात्रै नवीकरण नगर्ने भनेको छ, तर यसपटक करिब ८० हजार सदस्यको सदस्यता नवीकरण भएको छ,’ नेता परियारले भने, ‘त्यसकारण ठूलो संख्यामा लामो समयदेखि क्रियाशील रहेका सदस्यको नवीकरण छुट नहोस् भनेर मौका दिइएको हो ।’

समितिले आगामी असार ९ गतेभित्र सदस्यको शुल्कसहित सदस्यहरुको विवरण पठाउन निर्देशन गरेको छ । कांग्रेसको महाधिवेशन आगामी भदौ १६ देखि १९ गतेसम्म हुँदैछ । विस्तृत कार्यतालिका तयार गर्न बिहीबारदेखि केन्द्रीय कार्यसमितिको बैठक चलिरहेको छ । शुक्रबार दिउँसो १ बजे केन्द्रीय समितिको बैठक बस्दैछ ।

बैठकमा क्रियाशील सदस्यता छानविनका लागि छानविन समितिलाई २० असारसम्मको मात्रै समय दिनुपर्ने प्रस्ताव पेश भएको छ । यो अवस्थामा समितिलाई क्रियाशीलको टुंगो लगाउन चुनौतीपूर्ण छ । तर, समितिले छुट भएकाहरुको हकमा नवीकरण गर्ने मौका दिएको छ ।

क्रियाशील सदस्य नै कांग्रेसका तल्ला तहका मतदाता हुन् । क्रियाशील सदस्यले जिल्ला र क्षेत्रीय अधिवेशनका प्रतिनिधि चयन गर्छन् । ती प्रतिनिधिले केन्द्रीय नेतृत्व चयन गर्ने केन्द्रीय महाधिवेशन प्रतिनिधि चुनेर पठाउँछन् ।

१३ औँ महाधिवेशनमा क्रियाशील सदस्यको संख्या चार लाख ७० हजार थियो । तर, यसपटक त्यसमध्येबाट तीन लाख ८० हजार तीन सय ७८ जनाले मात्रै सदस्यता नवीकरण गरेका छन् ।

दरबार टाइम्समा प्रकाशित सामग्रीबारे कुनै गुनासो, सूचना तथा सुझाव भए हामीलाई durbartimes@gmail.com मा पठाउनु होला।

- Advertisement -spot_img
- Advertisement-spot_img

LEAVE A REPLY

Please enter your comment!
Please enter your name here

सम्बन्धित खवर

ट्रेन्डिङ

सिफारिस

धेरै कमेन्ट गरिएका

साताका समाचारहरु