Information is intelligence
HomeNews१५ साउनबाट सर्वोच्चले पूर्ण रूपमा सेवा दिने

१५ साउनबाट सर्वोच्चले पूर्ण रूपमा सेवा दिने

- Advertisement -spot_img

सर्वोच्च अदालतले साउन मध्यबाट पूर्णरूपमा सेवा दिने जनाएको छ । कोरोना महामारीका कारण सेवा संकुचित गरेको दुई महिनापछि सर्वोच्चले सबै प्रकारका सेवा नियमित रूपमा सञ्चालन गर्ने भएको हो । ३१ असारमा बसेको सर्वोच्चको पूर्ण बैठकले यस्तो निर्णय गरेको सर्वोच्चका प्रवक्ता बाबुराम दाहालले जानकारी दिएका छन् । ‘…सर्वोच्च अदालतबाट सम्पादन हुने कामकारबाही र सेवा प्रवाहका सम्बन्धमा मिति २०७८/०१/१४ तथा तत्पश्चात् विभिन्न मितिमा बसेको पूर्ण बैठकबाट आवश्यक निर्णयहरू भई सोअनुरूपको व्यवस्थापन हुँदै आएकोमा २०७८/०४/१५ देखि स्वास्थ्य सुरक्षासम्बन्धी निर्धारित सम्पूर्ण मापदण्डहरूको पूर्णपालना हुने गरी यस अदालतबाट प्रवाह गरिने सबै प्रकारका (दर्ता र सुनुवाइसम्बन्धी) सेवाहरू नियमित रूपमा सञ्चालन गर्ने,’ विज्ञप्तिमा भनिएको छ ।

अदालतले सेवा संकुचन गरेको अवधिभित्रको हदम्याद, म्याद र तारेख गत वर्ष १५ जेठमा गरेको आदेशअनुसार हुने जनाएको छ । अर्थात् यस अवधिमा हदम्याद लाग्नेछैन भने म्याद र तारेख गुज्रिएको मानिने छैन । नेपालमा कोभिडको दोस्रो लहर सुरु भएसँगै सर्वोच्चले आफ्नो सेवामा सीमितता ल्याएको थियो ।

कोभिडले दुई न्यायाधीशको निधन, एक सय २६ जना संक्रमित
उच्च अदालत पाटनअन्तर्गतका दुईजना न्यायाधीशको कोरोनाका कारण निधन भएको छ । उच्च अदालतअन्तर्गतका १३ जिल्लाका १५ अदालतहरूमध्ये धादिङ र काठमाडौं जिल्ला अदालतका न्यायाधीशको कोरोना संक्रमणबाट ज्यान गएको हो । जिल्ला अदालत काठमाडौंका न्यायाधीश वासुदेवलाल श्रेष्ठको गत ३० वैशाखमा उपचारकै क्रममा उनको ज्यान गएको थियो । यसैगरी, धादिङका जिल्ला न्यायाधीश देवेन्द्र पौडेलको २१ जेठमा उपचारकै क्रममा निधन भएको थियो । ५५ वर्षीय उनी दुई वर्षदेखि जिल्ला अदालत धादिङमा कार्यरत थिए ।

उच्च अदालतका क्षेत्राधिकारभित्रका सबैभन्दा बढी प्रभावित अदालतमध्ये काठमाडौंं जिल्ला अदालतका आठ न्यायाधीश हालसम्म कोरोना संक्रमित भइसकेका छन् भने अधिकृत र कर्मचारीसहित ४३ जनामा संक्रमण देखिइसकेको छ । उच्च अदालतका अनुसार १३ जिल्लाका १५ अदालतका १२ न्यायाधीश, २२ जना अधिकृत, ९२ जना अन्य कर्मचारीहरूलाई कोरोना संक्रमण भएको छ ।

यसैबीच, पाटन उच्च अदालतले ५४.४९ प्रतिशत मुद्दा फस्र्योट गरेको जनाएको छ । वार्षिक लक्ष्य ७१.१८ राखे पनि त्यसभन्दा १६.६९ प्रतिशत कम मुद्दा फस्र्योट भएका हुन् । निषेधाज्ञाका अवधिमा राजस्व चुहावटका ११ मुद्दा दर्ता भएकोमा एउटा पनि फस्र्योट हुन सकेको छैन । सबैभन्दा धेरै पुनरावेदन निवेदनहरू चार सय १६ वटा फस्र्योट भएको अदालतको तथ्यांक छ । अदालतमा दुई वर्ष नाघेका ६ सय ४७ मुद्दा विचाराधीन छन् । गत आर्थिक वर्षमा पाटन उच्च अदालतले ६ हजार तीन सय ६६ वटा मुद्दाको फैसला गरेको छ, जसमध्ये ६ सय ५८ वटा न्यायाधीश कुलप्रसाद शर्माले गरेको पाटन उच्च अदालतले जनाएको छ ।

दरबार टाइम्समा प्रकाशित सामग्रीबारे कुनै गुनासो, सूचना तथा सुझाव भए हामीलाई durbartimes@gmail.com मा पठाउनु होला।

- Advertisement -spot_img
- Advertisement-spot_img

LEAVE A REPLY

Please enter your comment!
Please enter your name here

सम्बन्धित खवर

ट्रेन्डिङ

सिफारिस

धेरै कमेन्ट गरिएका

साताका समाचारहरु