सन्दीपले होबार्टबाट बिग ब्यास खेल्ने


सन्दीपले होबार्टबाट बिग ब्यास खेल्ने

नेपाली राष्ट्रिय क्रिकेट टोलीका लेग स्पिनर सन्दीप लामिछानेले अष्ट्रेलियाको चर्चित बिग ब्यास लिग (बिबिएल) होबार्टबाट खेल्ने भएका छन् ।

यस अघिका दुई सिजन मेलबर्न स्टार्सबाट खेलेका सन्दीपलाई टोलीले सम्झौता नविकरण नगरेपछि नयाँ टोलीको खोजी गरेका थिए । जसमा होबार्ट हरिकेन्सबाट खेल्ने पक्का भएको छ । होबार्टले बिहीबार औपचारिक रुपमा सार्वजनिक गर्ने सन्दीपको व्यवस्थापन हेर्दै आएका नेपाली क्रिकेट टोलीका टेक्निकल एनालिष्ट रमन शिवाकोटीले जानकारी दिएका छन् ।

सन्दीपले हाेबार्टबाट खेल्न पाउनु सम्मान भएकाे बताएका छन् । ‘बीबीएल १० को लागि होबार्टमा सामेल हुन पाउँदा सम्मान महसुस गरेको छु । अष्ट्रेलियामा मैले सधैँ माया र सम्मान पाएको छु,’ सम्झौतापछि २० वर्षे सन्दीपले भनेका छन्, ‘म ब्लन्डस्टोन एरिनामा खेल्नका लागि थप कुर्न सक्दिनँ ।’

होबर्टका मुख्य प्रशिक्षक एडम ग्रिफ्टले सन्दीपको अगमनले टिमको बलिङ पक्ष थप बलियो भएको बताए । ‘हामी देखेका छौँ कि सन्दीपले रहस्यमय स्पिनको साथ खेल परिवर्तन गर्न सक्छन् । इनिङ्सको कुनै पनि चरणमा बलिङ गर्न सक्छन् । उनी एक विकेट टेकर हुन् जसले हाम्रो बलिङमा अर्को आयाम थप्नेछ,’ उनले भनेका छन् ।

बीबीएल आगामी डिसेम्बर १० बाट सुरु हुनेछ । यस सिजनमा हरेक टिमले ३ खेलाडीलाई प्लेईङ सेटमा राख्न पाउने छन् । यस अघि बीबीएलमा २ विदेशी खेलाडी मात्र राख्न पाईने नियम रहेको थियो ।

सन्दीपसँगै टी २० का नम्बर वान ब्याट्सम्यान डेविड मालानले पनि हाेबार्टबाट खेल्नेछन् । यस्तै वेष्ट ईन्डिजका अलराउण्डर किमाे पउल पनि हाेबार्टमा अनुबन्धित भएका छन् ।


Share Tweet Send
प्रतिकृया दिनुहोस्
Loading...